I WILL DO BETTER UNTO YOU THAN AT YOUR BEGINNINGS

முந்தின சீரைப் பார்க்கிலும் உங்களுக்கு நற்சீர் உண்டாகச் செய்வேன் 

ஆண்டவர் நமக்கு கொடுத்திருக்கின்ற புதுவருட  வாக்குத்தத்தம் உங்கள் அனைவரது வாழ்க்கையிலும் நிறைவேற நான் வாஞ்சிக்கின்றேன்! ஜெபிக்கின்றேன்!

இந்த வசனத்தை நாம் கவனித்து வாசித்தோமானால், இந்த வாக்கு மலைக்குச் சொல்லப்பட்டது என அறிந்து கொள்ளுவோம். ஆண்டவர் மலைக்கு அல்லது இடத்துக்கு வாக்குக் கொடுப்பாரா? என்ற கேள்வி எழும். எசேக்கியேல் 36:8ல்,

"இஸ்ரவேல் மலைகளே, நீங்கள் உங்கள் கொப்புகளை விட்டு, என் ஜனமாகிய இஸ்ரவேலுக்கு உங்கள் கனிகளைக் கொடுப்பீர்கள்;....." 

இதே புத்தகத்தில், 6:1,2,3ல்,

"கர்த்தருடைய வார்த்தை எனக்கு உண்டாகி, அவர்:

மனுபுத்திரனே, நீ இஸ்ரவேலின் பர்வதங்களுக்கு நேராக உன் முகத்தைத் திருப்பி, அவைகளுக்கு விரோதமாகத் தீர்கதரிசனம் உரைத்துச் சொல்லவேண்டியது என்னவென்றால்,

இஸ்ரவேல் பர்வதங்களே, கர்த்தராகிய ஆண்டவரின் வார்த்தையைக் கேளுங்கள்; ..........."

மேலே உள்ளபடி பார்க்கும் போது, தீர்கத்தரிசனம் கூட மலையைப் பார்த்துக் கூறப்படுகின்றது. 

இங்கே இஸ்ரவேல் மக்களுக்குத்தான் இந்த வாக்குத்தத்தம். ஆவிக்குறிய இஸ்ரவேலராகிய நமக்கும் இந்த வாக்குத்தத்தம் பொருந்துகின்றது. 

யோபுவினுடைய வாழ்க்கை:

'முந்தின சீரைப்பார்க்கிலும் நற்சீர்', எனும்பொழுது யோபுவினுடைய வாழ்க்கை நமக்கு நினைவுக்கு வருகிறது. யோபு 42:12ல்,

"கர்த்தர் யோபின் முன்னிலைமையைப் பார்க்கிலும் அவன் பின்னிலைமையை ஆசீர்வதித்தார்;....."

ஆண்டவர் யோபுவின் வாழ்க்கையை ஆசீர்வதிக்கக் காரணம், யோபு 2:10ல், 

"யோபு தன் சிநேகிதருக்காக வேண்டுதல் செய்தபோது, கர்த்தர் அவன் சிறையிருப்பை மாற்றினார். யோபுவுக்கு முன் இருந்த எல்லாவற்றைப் பார்க்கிலும் இரண்டத்தனையாய்க் கர்த்தர் அவனுக்குத் தந்தருளினார்"

நாம் நமது சிநேகிதருக்காக ஜெபிக்க வேண்டும். ஆண்டவரிடம் மன்றாட வேண்டும். அவர்களுக்கு இருக்கும் வியாதி சுகமாகும்படியாக, குடும்பத்தேவைகள் சந்திக்கப்படும் படியாக, பிரச்சனைகளில் இருந்து விடுவிக்கும்படியாக, ஆண்டவருடைய கோபம் அவர்கள் மீது மூளாதிருக்கும்படி நாம் ஜெபிக்க வேண்டும். அப்பொழுது முந்தின சீரைப் பார்க்கிலும் நற்சீர் உண்டாகும்.  மேலும் மத்தேயு 5:44ல்,

"நான் உங்களுக்குச் சொல்லுகிறேன்; உங்கள் சத்துருக்களைச் சிநேகியுங்கள்; உங்களைச் சபிக்கிறவர்களை ஆசீர்வதியுங்கள்; உங்களைப் பகைக்கிறவர்களுக்கு நன்மை செய்யுங்கள்; உங்களை நிந்திக்கிறவர்களுக்காகவும் உங்களைத் துன்பப்படுத்துகிறவர்களுக்காகவும் ஜெபம் பண்ணுங்கள்"

ஏன் நாம் இந்த வசனத்தை வைத்து ஜெபிக்கக்கூடாது? முந்தின சீரைப் பார்க்கிலும் நற்சீர் உண்டாகும். ஏரேமியா 31:27ல்,

"இதோ, நாட்கள் வருமென்று கர்த்தர் சொல்லுகிறார், அப்பொழுது இஸ்ரவேல் குடும்பத்தையும் யூதா குடும்பத்தையும் மனுஷ விதத்தினாலும், மிருக வித்தினாலும் விதைப்பேன்"

எரேமியா 33:12ல்,

"மனுஷனும் மிருகமும் இல்லாமல் அவாந்தரவெளியாய் கிடக்கிற இவ்விடத்திலும், இதற்கடுத்த பட்டணங்களிலும், ஆட்டுமந்தையை மேய்த்து மடக்குகிற மேய்ப்பர்களின் தாபரங்கள் உண்டாயிருக்கும் என்று சேனைகளின் கர்த்தர் சொல்லுகிறார்"

குறிப்பாக புதிய சபைகளின் எண்ணிக்கை பெருகும். 

 சரி! இந்த வாக்குத்தத்தத்தை எப்படி உங்களுக்கு சொந்தமாக்கிக் கொள்ளலாம்? ரோமர் 4:17-24ல்,

"அநேக ஜாதிகளுக்கு உன்னைத் தகப்பனாக ஏற்படுத்தினேன் என்று எழுதியிருக்கிறபடி, அவன் தான் விசுவாசித்தவருமாய், மரித்தோரை உயிர்ப்பித்து, இல்லாதவைகளை இருக்கிறவைகளைப்போல அழைக்கிறவருமாயிருக்கிற தேவனுக்கு முன்பாக நம்மெல்லாருக்கும் தகப்பனானான்.

உன் சந்ததி இவ்வளவாயிருக்கும் என்று சொல்லப்பட்டபடியே, தான் அநேக ஜாதிகளுக்குத் தகப்பனாவதை நம்புவதற்கு ஏதுவில்லாதிருந்தும், அதை நம்பிக்கையோடே விசுவாசித்தான்.

அவன் விசுவாசத்திலே பலவீனமாயிருக்கவில்லை; அவன் ஏறக்குறைய நூறு வயதுள்ளவனாயிருக்கும்போது, தன் சரீரம் செத்துப் போனதையும், சாராளுடைய கர்ப்பம் செத்துப் போனதையும் எண்ணாதிருந்தான்.

தேவனுடைய வாக்குத்தத்தத்தைக் குறித்து அவன் அவிசுவாசமாய் சந்தேகப்படாமல்,

தேவன் வாக்குத்தத்தம் பண்ணினதை நிறைவேற்ற வல்லவராயிருக்கிறாரென்று முழு நிச்சயமாய் நம்பி, தேவனை மகிமைப்படுத்தி, விசுவாசத்தில் வல்லவனானான்.

ஆகையால் அது அவனுக்கு நீதியாக எண்ணப்பட்டது.

அது அவனுக்கு நீதியாக எண்ணப்பட்டதென்பது, அவனுக்காக மாத்திரமல்ல, நமக்காகவும் எழுதப்பட்டிருக்கிறது.

நம்முடைய கர்த்தராகிய இயேசுவை மரித்தோரிலிருந்து எழுப்பினவரை விசுவாசிக்கிற நமக்கும் அப்படியே எண்ணப்படும்"

மேலே உள்ள வசனத்தைக் கவனித்தோமானால்,

நமக்கு எதில் எதில் நற்சீர் உண்டாக வேண்டும் என நிதானித்து, அதற்கு விரோதமான செய்திகளைத் தவிர்த்து,  அதாவது உங்களது நம்பிக்கையை தகர்க்கக் கூடிய எதையும் மனதைவிட்டு அப்புறப்படுத்த வேண்டும். உங்களுக்கு கிடைக்க வேண்டிய நன்மையானவறுக்கு எதிரான செய்திகளுக்கு உள்ளத்தில் இடமளிக்கக் கூடாது. இந்த வாக்குத்தத்தத்தை நிறைவேற்ற வல்லமையுள்ள கர்த்தரை துதித்து மகிமைப்படுத்தவேண்டும். அப்படி செய்யும் பொழுது நீங்கள் அற்புதவிதமான விசுவாசத்தைப் பெற்றுக் கொள்ளுவீர்கள். இது எப்படியாகும்? எனக் கேட்ட மரியாளுக்கு இதுதான் பதிலாக கொடுக்கப்பட்டது. 'விசுவாசிக்கிறவனுக்கு எல்லாம் கூடும்'

ஜெபிப்போமா?

அன்பின் பிதாவே, இயேசுவின் நாமத்தில் உமது சமூகத்தில் வருகின்றேன், இந்த வருட வாக்குத்தத்தத்ததிற்காய் உமக்கு நன்றி செலுத்துகிறோம், நேற்றும் இன்றும் என்றும் மாறாத தேவனே உமக்கு ஸ்தோத்திரம்! நான் இருக்கிறவராகவே இருக்கிறேன் என்றவரே உமக்கு ஸ்தோத்திரம், நான் கர்த்தர், நான் மாறுவதில்லை என்றவரே உமக்கு ஸ்தோத்திரம், இந்த எசேக்கியேல் 36:11ன் படி முந்தின சீரைப்பார்க்கிலும் நற்சீர் உண்டாகச் செய்வதற்காய் உமக்கு நன்றி! இந்த வாக்கை நிறைவேற்ற வல்லமையுள்ளவரே உமக்கு ஸ்தோத்திரம்! இந்த வாக்கு நிறைவேறும் பொழுது, உமது நாமத்தை இன்னும் அதிகமாய் துதிக்க கிருபை தருவதற்காய் நன்றி! உமது வல்லமைக்காய் நன்றி! இயேசுவின் மூலம் ஜெபத்துக்கு பதில் தருவதற்காய் நன்றி! இந்த ஜெபத்தை எனக்காய் மறித்து உயிர்த்த இயேசுவின் நாமத்தில் ஏறெடுக்கிறேன் பிதாவே. ஆமென் ஆமென். 

வாக்கு மாறாத தேவனின் வாக்கு!