நீங்கள் கடவுளின் பிள்ளைகள்!!
நண்பர்கள் யாவருக்கும் வாழ்த்துங்களுடன் வணக்கங்கள்!
"அவருடைய நாமத்தின் மேல் விசுவாசமுள்ளவர்களாய் அவரை ஏற்றுக் கொண்டவர்கள் எத்தனைபேர்களோ, அத்தனைபேர்களும் தேவனுடைய பிள்ளைகளாகும்படி, அவர்களுக்கு அதிகாரங்கொடுத்தார்" (யோவான் 1:12)
வெகு நாட்களுக்கு முன் நகைக்கடை ஒன்றில் வாலிபன் ஒருவன் விற்பனைப் பிரிவில் வேலைக்குச் சேர்ந்தான். அவன் தனது வேலையில் அர்ப்பணிப்பினாலும், உண்மையினாலும் படிப்படியாக உயர்ந்து, அந்த கிளையின் மேலாளர் ஆனான். மேலும் தனது திறமையைப் பயன்படுத்தி அந்த கிளையின் விற்பனையை இருமடங்காக்கினான். இதை பார்த்த அந்த கடையின் நிர்வாகம் அவனை இன்னும் 2 கிளைகளுக்கு சேர்த்து மேலாளர் ஆக்கியது. அந்த கிளைகளும் விற்பனையின் உச்சகட்டத்தை எட்டியது. எனவே தனது எல்லாக் கிளைகளுக்கு சேர்த்து பொது மேலாளர் ஆக்கியது நிர்வாகம். நல்ல சம்பளம், இதர வசதிகள்....... இப்பொழுது அக்கடையின் முதலாளி சொத்துக்களை தனது பிள்ளைகளுக்கு பிரித்துக் கொடுக்க ஏற்பாடு செய்தார். இதை அறிந்த அந்த பொது மேலாளர், நீதிமன்றத்தில் வழக்கு ஒன்றைத் தொடுத்தார். அதில் எனது நிர்வாகத்தில்தான் எங்கள் கடை பல்வேறு கிளைகளாகப் பிரிந்து விரிந்து, நல்ல வருமானத்தை ஈட்டியது. எனவே சொத்தில் ஒரு பங்கை எனக்கு கொடுக்க உத்திரவிட வேண்டும் என குறிப்பிட்டு இருந்தார்.
சற்று யோசித்துப் பாருங்கள்! நீதிமன்றம் என்ன தீர்ப்பளித்திருக்கும். நீதிமன்றம் நீர் எவ்வளவுதான் இந்த கடைக்காக உழைத்து இதின் வளர்ச்சிக்கு பாடுபட்டிருந்தாலும், நீர் சம்பளம் வாங்குகிற வேலைக்காரன்தான்! இந்த சொத்துக்கள் அவருடைய பிள்ளைகளுக்கே சேரும், சந்ததிதான் சொத்துக்களை அனுபவிக்க முடியும் என தீர்ப்பளித்தது.
இதேதான் மேலே நீங்கள் வாசித்த வசனமும் கூறுகின்றது. ஆண்டவருக்கு உரியதெல்லாம், உங்களுக்குத்தான், (அதிகாரத்தோடுகூட) நீங்கள்தான் அனுபவிக்க முடியும். இயேசு சிலுவையில் சம்பாதித்து வைத்திருக்கும் அனைத்து ஆசீர்வாதங்களும் உங்களை சேர்ந்தது!
ஒருவேளை அந்த நகைக்கடைக்காரரின் பிள்ளைகள் துன்மார்க்கமாக ஜீவித்தாலும் அனுபவ பாத்தியதை அனைத்தும் பிள்ளைகளுக்குத்தான். காரணம் பிள்ளைகள் என்ற மாறாத, உரிமையான உறவுதான்!
ஒருவேளை நீங்கள் ஆண்டவரைப் பார்த்து நான் தகுதி இல்லாதவன் (ள்), குப்பை, புழு, ஒன்றுக்கும் உதவாதவள் (ன்) என்றெல்லாம் ஜெபித்திருந்தாலும், (ஆண்டவருக்கு முன்பாக தாழ்மைப்படுங்கள் என்பது இப்படிக்கு கூறுவது அல்ல, நீங்கள் இப்போதிருக்கும் நிலைமையை அப்படியே ஆண்டவரிடம் ஒத்துக்கொள்ளுவதும், ஆண்டவருடைய மகிமையை-வல்லமையை-அன்பை உயர்த்திப் புகழுவதும்தான்) ஆண்டவர் என்னவோ உங்களை தனது மகளாக, மகனாகத்தான் பார்க்கின்றார். அவர் வானத்தையும், பூமியையும் படைத்தவர். அவர் உங்கள் சொந்த தகப்பன் என்ற உரிமையின் அடிப்படையில் கெட்டப் பெற்று கொள்ளவேண்டும்! இயேசு சிலுவையில் சம்பாதித்த அனைத்தும் பாவமன்னிப்பு (முக்காலத்துக்கும்), சுகம், சாபத்திலிருந்து விடுதலை உங்களுக்கு சொந்தமானது. இதில் ஏதாவது ஒன்றில் நெருடல் வந்தால், கடவுளுடைய பிள்ளைகள் என்ற அதிகாரத்தை நீங்கள் பயன்படுத்தவேண்டும். நீங்கள் மறுபடியும் பிறந்தவர்கள்!
உங்கள் பிள்ளைகள் உங்கள் விருப்பத்தினாலோ, செயல்களினாலோ பிறவாமல் தேவனால் பிறந்தவர்கள். மேலும் 1பேதுரு 1:23ன் படி,
"அழிவுள்ள வித்தினாலே அல்ல, என்றென்றைக்கும் நிற்கிறதும் ஜீவனுள்ளதுமான தேவ வசனமாகிய அழிவில்லாத வித்தினாலே மறுபடியும் ஜெநிப்பிக்கப்பட்டிருக்கின்றீர்களே" (பிறப்பிக்கப் பட்டிருக்கின்றீர்களே )
இங்கே நான் குறிப்பிடுவது உங்களையும் உங்கள் பிள்ளைகளையும் சேர்த்து. இதை நீங்கள் விசுவாசிக்கிண்றீர்களா?
விசுவாசித்தால் வரும் பலன்:
"தேவனால் பிறந்த எவனும் பாவஞ்செய்யான், ஏனெனில் அவருடைய வித்து அவனுக்குள் தரித்திருக்கிறது; அவன் தேவனால் பிறந்தபடியினால் பாவஞ்செய்ய மாட்டான்" (1யோவான் 3:9).
மேலும், இந்த வசனம் உங்களை உற்ச்சாகப்படுத்துகின்றது. 1யோவான் 5:18ல்,
"தேவனால் பிறந்த எவனும் பாவஞ்செய்யானென்று அறிந்திருக்கிறோம். தேவனால் பிறந்தவன் தன்னைக் காக்கிறான். பொல்லாங்கன் அவனைத் தொடான்"
உங்கள் பிள்ளைகள் பாவஞ்செய்ய மாட்டார்கள் என நீங்கள் அறிந்திருக்கின்ரீகளா?
எனவே பிள்ளைகளைக் குறித்த பயம், கவலைகளை விட்டொழியுங்கள். பிள்ளைகளைக் குறித்த பயம் அல்லது கவலை வந்தால் இந்த வசனங்களை, (உங்களுக்கு ஆண்டவர் அதிகாரம் கொடுத்திருக்கின்றார்) பயன்படுத்துங்கள், அறிக்கை செய்யுங்கள். சமாதானத்தைப் பெற்று கொள்ளுவீர்கள்! அறிக்கை செய்ததின் பலனைப் பெற்று கொள்ளுங்கள்!
உன் பிள்ளைகள் கர்த்தரால் போதிக்கப்பட்டிருப்பார்கள், அவர்களுடைய சமாதானம் பெரிதாய் இருக்கும். உங்கள் பிள்ளைகளுக்கு நீங்கள் நல்ல ஈவுகளைக் கொடுக்க அறிந்திருக்கும்போது, தமது பிள்ளைகளான உங்களுக்கு பரிசுத்த ஆவியை-நன்மைகளை வழங்காதிருப்பாரோ? நிச்சயமாகவே கொடுப்பார்.
இயேசு கிறிஸ்து, கூனியை சுகப்படுத்தியதை நீங்கள் அறிவீர்கள், சகேயு வீட்டுக்கு இரட்சிப்பு வழங்கியதையும் அறிவீர்கள்! இந்த இரு நபர்களிடமும் ஆண்டவர் பார்த்தது என்ன தெரியுமா? கூனியைப் பார்த்து, இவளும் ஆபிரகாமின் குமாரத்தியாய் இருக்கிறாள் என்றும், சகேயுவை பார்த்து, இவனும் ஆபிரகாமுக்கு குமாரனாய் இருக்கிறானே என்றும் கூறினார். ஆண்டவர் பார்த்த தகுதி இதுதான்.
"நீங்கள் கிறிஸ்துவினுடையவர்களானால் ஆபிரகாமின் சந்ததியாராயும், வாக்குத்தத்தத்தின்படியே சுதந்தரராகவும் இருக்கின்ரீர்கள்" (கலா.3:29)
உங்களை ஆசீர்வதிக்க ஆண்டவர் உங்களிடம் பார்க்கும் ஒரே தகுதி, நீங்கள் தேவனுடைய பிள்ளைகள்; ஆபிரகாமின் சந்ததியார். எனவே தைரியமாய் கிருபாசனத்தண்டையிலே நெருங்கிச் சேருங்கள்!
ஜெபிப்போம்!
எங்களை நேசிக்கின்ற அன்பின் பிதாவே! இயேசுவின் நாமத்தில் உமக்கு துதி, கணம், மகிமையை செலுத்துகிறோம்! இதை படிக்கின்ற அன்பு நண்பர்கள் யாவரையும் விசுவாசத்தின் மூலமாக, உமது பிள்ளைகளாக தெரிந்து உமது அதிகாரத்தை தந்திருப்பதற்காய் உமக்கு நன்றி! உமது பிள்ளைகள் என்ற சுதந்திரத்தினால் வரும் அத்தனை ஆசீர்வாதத்தையும் பெற்று அனுபவிக்கவும், பிறருக்கு ஆசீர்வாதமாய் இருக்கவும், எங்களை இந்த செய்தியின் மூலமாய் நடத்தியதற்காய் நன்றி!! நாங்களும் எங்கள் சந்ததியும் இயேசுவின் நாம மகிமைக்காக வாழ ஒப்புக்கொடுக்கின்றோம்! நாங்கள் பெற்று இருக்கிற இந்த பேற்றை எமது இரட்சிக்கப்படாத நண்பர்கள், உறவினர்கள், தெரிந்தவர்கள், மற்றும் அக்கம்பக்கத்திலுள்ளோர் அனைவரும் பெற்றுக்கொள்ள ஜெபிக்கிறோம்! அதற்கான பிரயாசங்களை ஆசீர்வதியும்! இயேசுவின் மூலம் ஜெபம் கேளும் எங்கள் பிதாவே! ஆமென், ஆமென்.
No comments:
Post a Comment