IF YOU BELIEVE........

நீ விசுவாசித்தால்.....

 

"நீ விசுவாசித்தால் தேவனுடைய மகிமையைக் காண்பாய் என்று நான் உனக்கு சொல்லவில்லையா என்றார்" (யோவான் 11:40)

 

 

கிறிஸ்துவில் பிரியமானவர்களே...... இந்த இடத்தில் உங்களை சந்திக்கச் செய்த கிருபைகளுக்காய் நம் ஆண்டவரை ஸ்தோத்தரிகின்றேன்!அற்புதத்திற்காய் நம் ஆண்டவரை சந்தித்த ஒவ்வொருவரிடமும் ஆண்டவர் எதிர்பார்த்தது விசுவாசத்தையே என்பதை நாம் அறிவோம்!

 

ஒருமுறை ஊழியத்துக்கு சென்ற பொழுது, ஒரு சகோதரி என்னை தெருவில் சந்தித்து, "பிரதர் என் தம்பி குடிப்பழக்கத்திலிருந்து விடுபட வேண்டும் என நான் 3 நாட்களாக உபவாசித்து ஜெபித்து வருகின்றேன், இது மூன்றாவது நாள்" என்றார்கள். நான் அவர்களை உற்சாகப்படுத்தும் விதமாக பேச ஆரம்பித்தேன். நான் பேசி முடிப்பதற்குள்ளாக, "இவன் எங்க திருந்தப் போகிறான்?" என்று திட்ட ஆரம்பித்தார்கள். நான் "நீங்கள் எதற்காக ஜெபிக்கின்றீர்களோ அதை ஆண்டவர் நிறைவேற்றுவார் என விசுவாசித்து விசுவாச வார்த்தைகளைப் பேசுங்கள்." எனக் கூறினேன். நான் ஜெபிப்பதை ஆண்டவர் கேட்க விரும்புகின்றார், அதே நேரத்தில் நான் பேசுவதையும் கவனித்துக் கேட்கின்றார். (மல்கியா 3:16) இதிலே நாம் கவனமாய் இருக்க வேண்டும்.

 

நமது 'பொய்யைப் பற்றிய உண்மை' என்ற கைப்பிரதியிலே ஒரு பாடல் ஒன்று வரும். அது,

 

இங்கே ஒரு சிறிய கதவு

எல்லோரும் அதைப் பூட்டலாம்

அந்த சிறிய கதவு

உங்கள் மூக்குக்குக் கீழே

 

அநேக நேரங்களில் பேசாமல் இருந்தாலே அற்ப்புதங்களை நாம் பெற்றுக் கொள்ள முடியும். எப்படி ஆண்டவர் நமது விசுவாசத்தை எதிர்பார்க்கின்றாரோ அதைப் போலவே நமது விசுவாச அறிக்கையையும் ஆண்டவர் எதிர் பார்க்கின்றார். ஆண்டவர் என் ஜெபத்துக்குப் பதில் தருவார் என்று விசுவாசித்துவிட்டு, நான் எப்படி வேண்டுமானாலும் மாற்றிப் பேசுவேன்' என்றால் எப்படி நாம் அற்புதத்தைப் பெற்றுக் கொள்ளமுடியும்? எதற்காக நாம் ஜெபிக்கின்றோமோ, அதிலே நாம் பொறுப்புடையவர்களாக இருக்க வேண்டும்.

 

இயேசுவுக்கு முன் விசுவாசத்தை அறிக்கை செய்த ஒரு மனிதனை நாம் பார்ப்போமா! அவனது அறிக்கை இயேசுவையே ஆச்சரியப்பட வைத்தது. மத்தேயு 8:8,9ல்,

"நூற்றுக்கு அதிபதி பிரதியுத்திரமாக: ஆண்டவரே! நீர் என் வீட்டுக்குள் பிரவேசிக்க நான் பாத்திரன் அல்ல; ஒரு வார்த்தை மாத்திரம் சொல்லும் என் வேலைக்காரன் சொஸ்தமாவான். நான் அதிகாரத்துக்குக் கீழ்ப் பட்டவனாயிருந்தும், எனக்கு கீழ்ப் பட்டிருக்கிற சேவகருமுண்டு; நான் ஒருவனை போவென்றால் போகிறான், மற்றொருவனை வாவென்றால் வருகின்றான், என் வேலைக்காரனை இதை செய் என்றால் செய்கிறான் என்றான்"

வாயிலிருந்து புறப்படும் வார்த்தைக்கு எவ்வளவு வல்லமை இருக்கின்றது என்பதை இந்த நூற்றுக்கு அதிபதி நன்கு அறிந்திருந்தான். இதுவே ஆண்டவரை ஆச்சரியப்பட வைத்தது. நாமும் நமது விசுவாசத்தை அறிக்கையிடுவதில் கவனமாயிருப்போம். விசுவாச அறிக்கை என்றாலே நமது நினைவுக்கு வருவது 23 ம் சங்கீதந்தான்.

 

1. "கர்த்தர் என் மேய்ப்பராய் இருக்கிறார் நான் தாழ்ச்சியடையேன்........." ஆண்டவர் என் மேய்ப்பராய் //// வழிகாட்டியாய் //// என்னை ஆளுகை செய்பவராய் இருக்கிறார். எனவே நான் தாழ்ச்சியடைவதில்லை, குறைவு பட்டுப் போவதில்லை, மாறாக நான் மேன்மையடைவேன். என்னுடைய எல்லாச் சூழ்நிலையும் இயேசுவின் கட்டுப்பாட்டுக்குள்ளாக இருக்கிறது.

 

2. "அவர் என்னைப் புல்லுள்ள இடங்களில் மேய்த்து அமர்ந்த தண்ணீர்கள் அண்டையில் கொண்டுபோய் விடுகின்றார்............." எனக்கு நல்ல வருமானம் வரும் இடத்திற்கு என்னை வழி நடத்துகின்றார். என்னைப் போஷிக்கின்றார், நான் பரிபூரண திருப்தியடையும் படி என்னை ஆசீர்வதிக்கின்றார். எனவே நான் சுகித்திருக்கிறேன். எந்த எதிரியின் பயமும் எனக்கு இல்லை. கவலையும் எனக்கு இல்லை.

 

3. "அவர் என் ஆத்துமாவைத் தேற்றி தமது நாமத்தினிமித்தம் என்னை நீதியின் பாதையில் நடத்துகின்றார்........" நான் என் வாழ்க்கையில் சந்திக்கிற எந்த கடினமான  சூழ்நிலையையும் தமது நாம மகிமைக்காக பயன்படுத்துகிறார். (நான் ஏமாற்றப் படும்போதும் //// துன்பப்படும்போதும்) அவர் என் உள்ளத்தைத் தேற்றி,  அவரது நாம மகிமைக்காக என்னை நீதியின் பாதையில் நடத்துகின்றார். (இதை சொல்லும் போதே உங்கள் உள்ளத்தில் சமாதானத்தை உணருவீர்கள்).

 

4. "நான் மரண இருளின் பள்ளத்தாக்கிலே நடந்தாலும் பொல்லாப்புக்குப் பயப்படேன்; தேவரீர் என்னோடே கூட இருக்கிறீர்; உமது கோலும் உமது தடியும் என்னைத் தேற்றும்......." உதவி செய்ய ஒருவருமில்லாமல், கஷ்ட்டத்தின் மத்தியில், என்னைப் புரிந்து கொள்ள ஆளில்லாத சூழ்நிலையில் மரண இருளிலே இருந்தாலும், சகலத்தையும் அறிந்திருக்கிற தேவன் என்னோடிருக்கின்ரீர். அடுத்து என்ன செய்வது என்று திகைத்து நிற்கின்ற சூழ்நிலையிலும், தேவரீர் உமது வழியைவிட்டு நான் விலகிச் செல்லும் போதும், உமது கோலும் உமது தடியும் என்னை மிகச் சரியான வழியிலே நடத்துகிறது. 

 

5. "என் சத்துருக்களுக்கு முன்பாக நீர் எனக்கு ஒரு பந்தியை ஆயத்தப் படுத்தி, என் தலையை எண்ணையால் அபிஷேகம் பண்ணுகிறீர்; என் பாத்திரம் நிரம்பி வழிகிறது........." நான் அவமானப் படுவதையும், நான் துன்பப்படுவதையும், பட்டினியாய் இருந்து கஷ்டபடுவதையும் கண்டு, சந்தோஷப் பட நினைக்கின்ற என் எதிரிகளுக்கு முன்பாக என் தலையை உயர்த்துகிரீர். மகிழ்ச்சியினால் என்னை நிறம்பி வழியப்  பண்ணுகின்றீர். 

 

6. "என் ஜீவனுள்ள நாளெல்லாம் நன்மையும் கிருபையும் என்னைத் தொடரும்; நான் கர்த்தருடைய வீட்டிலே நீடித்த நாட்களாய் நிலைத்திருப்பேன்.........." நான் உயிருடன் இருக்கும் வருடங்கள் எல்லாம்  நன்மையினாலும் தேவ கிருபையினாலும் நிறைந்திருப்பேன். நான் நீண்ட ஆயுளோடு இந்த உலகத்தில் வாழுவேன். 

 

இப்படி நாம் பொருளை உணர்ந்து, நமது விசுவாசத்தை அறிக்கை செய்தால், ஆயுள் முழுவதும் நன்மையினாலும் கிருபையினாலும் நிறைந்திருப்போம். விசுவாசத்தை அறிக்கை பண்ணுங்கள் ஆசீர்வதிக்கப் படுவீர்கள். 

 

"நீ விசுவாசித்தால் தேவனுடைய மகிமையைக் காண்பாய் என்று நான் உனக்கு சொல்லவில்லையா என்றார்" (யோவான் 11:40)

 

இந்த 11ம் அதிகாரம் முதலில் இருந்து வாசித்தோமானால் நிறைய உண்மைகளை நாம் அறிந்து கொள்ள முடியும். நாம் நமக்கு இங்கு தேவையானதை மட்டும் எடுத்துக் கொள்ளப் போகிறோம். வசனம் 4ல்,

 

"இயேசு அதைக் கேட்ட பொழுது: இந்த வியாதி மரணத்துக்கு ஏதுவாயிராமல் தேவனுடைய மகிமை விளங்குவதற்கு ஏதுவாய்ருக்கிறது; தேவனுடைய குமாரனும் அதினால் மகிமைப் படுவார் என்றார்"

 

எனக்கன்பான நண்பர்களே... நீங்கள் எந்த சூழ்நிலையில் இருந்தாலும், எந்தப் பிரச்னையை நீங்கள் சந்தித்தாலும், எந்த குறைவுகளில் நீங்கள் இருந்தாலும் அதனாலே ஆண்டவருடைய நாமம் மகிமைப்படும் என்பதை அறியுங்கள். அல்லேலுயா! அறிக்கை செய்யுங்கள்!

 

பெத்தானியாவுக்குப் போய் ஜெபிக்க நாலு நாள் தாமதப்படுத்தினார்!  உங்கள் ஜெபத்திற்கு பதில் தாமதமானாலும் மிகச் சரியான நேரத்தில் ஆண்டவரிடமிருந்து அற்புதங்களைப் பெற்றுக் கொள்ளுவீர்கள்!

 

நேராக மார்த்தாளும் மரியாளும் ஆண்டவரை சந்தித்த இடத்துக்கு வருவோம். அவர்கள் என்ன விசுவாச அறிக்கை செய்தார்கள் என்பதைக் கவனிப்போம்!   சத்தியம் உங்களை விடுதலையாக்கும்! வசனம் 21,22ல்,

 

"மார்த்தாள் இயேசுவினிடத்தில் வந்து: ஆண்டவரே, நீர் இங்கேயிருந்திருநதீரானால் என் சகோதரன் மரிக்க மாட்டான். இப்பொழுதும் நீர் தேவனிடத்தில் கேட்டுக் கொள்ளுவதெதுவோ அதைத் தேவன் உமக்குத் தந்தருளுவாறேன்று அறிந்திருக்கிறேன் என்றாள்"

 

என்ன ஒரு அருமையான அறிக்கை! இப்பொழுது நீர் ஜெபம் பண்ணினால் தேவன் உமக்குத் தந்தருளுவார் என்றாள். சூப்பர்! உடனே (வ23)

 

"இயேசு அவளை நோக்கி: உன் சகோதரன் உயித்தெழுந்திருப்பான் என்றார்" 

 

உடனே ஆச்சரியப்பட்டு மிகுந்த மகிழ்ச்சியோடு 'வாருங்கள் ஆண்டவரே... கல்லறையில் அவனை வைத்த இடத்தைக் காட்டுகின்றேன் என்று கூறிக் கொண்டே இயேசுவுக்கு முன்னே ஓடினாள். ஆனால் வேதாகமத்தில் அப்படி இல்லை. (வ 24)

 

"அதற்கு மார்த்தாள்: உயிர்த்தெழுதல் நடக்கும் கடைசி நாளிலே அவனும் உயிர்த்தெழுந்திருப்பான் என்று அறிந்திருக்கின்றேன் என்றாள்"

 

ஒரு அற்புதத்தை எங்கோ கொண்டு சென்றுவிட்டாள். மரியாளாவது சரியான அறிக்கை செய்தாளா எனப் பார்த்தோமானால் அதுவும் இல்லை. வ 35ல்,   

 

"இயேசு கண்ணீர் விட்டார்".

 

இப்பொழுது, வசனம் 39

 

"இயேசு கல்லை எடுத்துப் போடுங்கள் என்றார். மரித்தவனுடைய சகோதரியாகிய மார்த்தாள் அவரை நோக்கி: ஆண்டவரே, இப்பொழுது நாறுமே, நாலு நாளாயிற்றே என்றாள்"

 

அற்புதத்தை எதிர் பார்க்கும் என் அன்பு சகோதர சகோதரிகளே..... நீங்களும் அற்புதத்திற்கு எதிராய் பேசிக் கொண்டிருக்கின்றீர்களா? ஆனாலும் ஆண்டவர் தாம் ஏற்கனவே நிச்சயித்து இருந்ததினால் (வ 4) யாருமே எதிர்பாராத ஒரு அற்புதத்தை நிகழ்த்தினார். ஆண்டவரே உம்மிடத்தில் அற்புதத்தை எதிர்பார்த்துவிட்டு அதற்கு எதிராய் பேசியதை மன்னியும் என்று ஜெபித்து மனந்திரும்புங்கள். இதை வாசிக்கின்ற நீங்கள் ஒரு அற்புதத்தைச் சந்திப்பீர்கள்!

 

நமது ஆண்டவருடைய ஜெபத்தைப் பார்ப்போம்! (வ 41,42)

 

"அப்பொழுது மரித்தவன் வைக்கப்பட்ட இடத்திலிருந்த கல்லை எடுத்துப் போட்டார்கள். இயேசு தம்முடைய கண்களை ஏறெடுத்து: பிதாவே, நீர் எனக்குச் செவி கொடுத்தபடியினால் உம்மை ச்தொத்தரிகின்றேன். நீர் எப்பொழுதும் எனக்குச் செவி கொடுக்கிறீர் என்று நான் அறிந்திருக்கிறேன்; ஆனாலும் நீர் என்னை அனுப்பினதை சூழ்ந்து நிற்கும் ஜனங்கள் விசுவாசிக்கும்படியாக அவர்கள் நிமித்தம் இதைச் சொன்னேன் என்றார்"

 

நம்மெல்லாருக்கும் சவால் நிறைந்த ஒரு ஜெபம்! நம்மில் எத்தனை பேர் இப்படி ஜெபிக்க முடியும்? விஷேசமாக ஊழியர்கள்....... ஆண்டவரை விட்டு விலகச் செய்யும் பிசாசு, உலகம் மாம்சத்துக்கு எதிர்த்து நில்லுங்கள். தேவ பிரசன்னத்தினால் நிறைந்திருங்கள்!

 

"சகோதரரே, ஜீவனுள்ள தேவனை விட்டு விலகுவதற்கேதுவான அவிசுவாசமுள்ள பொல்லாத இருதயம் உங்களில் ஒருவனுக்குள்ளும் இராதபடிக்கு நீங்கள் எச்சரிக்கையாயிருங்கள்" (எபிரெயர் 3:12)

 

மேலும்,

 

"இவைகளைச் சொன்ன பின்பு லாசருவே, வெளியே வா என்று, உரத்த சத்தமாய் கூப்பிட்டார். அப்பொழுது, மரித்தவன் வெளியே வந்தான்......" (வ 43,44)

 

எவ்வளவு மகிழ்ச்சி!! மரித்த சகோதரனை இனிமேல் பார்க்க முடியாது என்று அழுது கொண்டு, துக்கத்தோடு இருந்த சகோதரிகளுக்கு எத்தனை மகிழ்ச்சி!! சூழ நின்ற ஜனங்கள் எல்லோரும் வாவ்.....! தேவனைப் புகழ்ந்தார்கள்! இதை வாசிக்கின்ற நீங்களும் உங்கள் வாழ்க்கையில் நீண்ட நாட்களாக எதிர்பார்த்த அற்புதத்தை வரும் நாட்களில் பெற்று ஆண்டவரை புகழுவீர்கள்!

 

 ஜெபிப்போமா!

 

எங்களை நேசித்து வழிநடத்தி வருகின்ற எங்கள் அன்பின் பிதாவே! எங்கள் விசுவாசத்தை அறிக்கை செய்து ஆசீர்வாதங்களைப் பெற்றுக் கொள்ள கிருபை செய்யும்.  குறிப்பாக ................ ........................ ..................... ............... ................... ........................ ..................... ........................ .......................... ........................... ................ ................................ ..................................... .................................... ............................ ........................ .. ..................................... ..........................................  (இங்கே ஆண்டவர் உங்களுக்கு செய்யவேண்டிய அற்புதத்தை சொல்லுங்கள்) இதிலே அற்புதத்தை செய்வதற்காய் நன்றி..... இயேசுவின் மூலம் ஜெபங்களும் பிதாவே.