GO IN PEACE.....

'நீ சமாதானத்தோடே போ'

"அவர் அவளைப் பார்த்து: மகளே உன் விசுவாசம் உன்னை இரட்சித்தது, நீ சமாதானத்தோடே போய், உன் வேதனை நீங்கி, சுகமாயிரு என்றார்." மாற்கு 5:34

 

இந்த வாக்குத்தத்திற்க்காய் தேவனை துதிக்கிறேன்! இதை வாசிக்கிற உங்களை ஆண்டவர் சுகப்படுத்துவார். இந்த பெரும்பாடுள்ள ஸ்திரீ சுகமாக்கிய சம்பவம், மத்தேயு 9:20-22 மற்றும் லூக்கா 8:43-48 வசனங்களிலும் இருக்கின்றது. பழைய ஏற்பாட்டுக் காலத்தில் பெண்களுக்கு அதிக சுதந்திரம் இல்லை. லேவியராகமம் 15:19-30 வசனங்களை வாசித்துப் பார்ப்பீர்களானால் வீட்டுக்கு விளக்கமான பெண் என்னன்ன செய்து தன்னைச் சுத்திகரித்துக்கொள்ளவேண்டும் என விளக்கமாக பார்க்கலாம். அந்த நாட்களில் அவளைத் தொடுகின்ற யாராய் இருந்தாலும், தீட்டுப் பட்டவர்களாக எண்ணப்படுவார்கள். தொட்டவர்கள் தங்கள் ஆடைகளைத் துவைத்து, குளித்தாலும் சாயங்காலம் வரைக்கும் தீட்டுப்பட்ட நிலைதான். 

 

உதிரத்தின் ஊரல் நின்றபின் 7 நாட்களுக்குப் பின் 8ம் நாளில் ஆலயத்துக்குச் சென்று பலி செலுத்தி உதிரத்தின் ஊரலின் நிமித்தம் பாவ நிவர்த்தி செய்ய வேண்டும். பின்புதான் அவள் சுத்தமானவளாகக் காணப்படுவாள். ஒரு பெண்ணின் நிலை மிக மோசமான நிலைதான். மாதந்தோறும் இப்படியென்றால் பன்னிரண்டு ஆண்டுகளாக உதிரத்தின் ஊரளினால் பெரும் பாடுபட்டாள். அதனால்தான் வேதம் இவளை பெரும்பாடுள்ள ஸ்திரி என்று அழைக்கிறது.

 

முதலில் வீட்டில் உள்ளவர்களோடு பழக முடியாமல், தனிமைப்படுத்தப் பட்ட வாழ்க்கை. பிள்ளையாய் இருந்தாலும் தொட முடியாது. தான் அமர்ந்த இடத்தில் பிறர் உட்கார முடியாது. எல்லாமே தீட்டாகிவிடும். இவளது நிலை மிக மோசமானதாக இருந்தது. ஏறக்குறைய தன் குடும்பத்தாராலேயே புறக்கணிக்கப் பட்ட / தீண்டத்தகாத நிலைமை. அண்டை அயலார் இவளை கண்டாலே தீட்டு என விலகிச் செல்லும் பொழுது இவள் உள்ளம் எப்படி உடைந்திருக்கும். இதில் சரீர வேதனை வேறு.

 

எந்தப் பெண்ணுமே விரும்பாத நிலை. அதுவும் அந்தக் காலத்தில் உள்ள சமுதாய நிலை மேக மோசமானது. எனவே வைத்தியர்களைத் தேடியதில் வியப்பு ஒன்றும் இல்லை. தான் கேள்விப்பட்ட வைத்தியரிடமெல்லாம் சென்றாள். எப்படியாவது தனக்குச் சுகமாக வேண்டும் என்ற வேகம் அவளுக்குள் இருந்தது. எனவே தன் சொத்துக்களை விற்றாவது வைத்தியம் பண்ணவேண்டும் என சொத்துக்களை விற்றாள். எந்த வைத்தியர்களாலும் அவளது நோய்க்கான காரணத்தைக் காண முடியவில்லை. நோய்க்கான காரணத்தைத் தேடவே தன் சொத்தில் பெரும்பகுதியை செலவளித்திருப்பாள்.

 

இந்த நாட்களில் இருமல் என்று டாக்டரிடம் சென்றாலே போதும். பிளட் டெஸ்ட், யூரின் டெஸ்ட், மோசன் டெஸ்ட் என்று பல நூற்றுக்கணக்கான ரூபாய் செலவாகின்றது. மேலும் சுகமாகவில்லை எனில், எக்ஸ்-ரே, ஸ்கேன் மற்றும் எக்கோ எல்லாம் எடுக்க வேண்டும். இப்படி டேஸ்டுக்கே பல ஆயிரங்களை செலவிட வேண்டியது உள்ளது. அந்த நாட்களில் வைத்திய செலவுக்கான இன்ஷுரன்ஸ் கூட கிடையாது.

 

இந்த பெரும்பாடுள்ள ஸ்திரியோ....... தனது சொத்துக்களை எல்லாம் விற்று வைத்தியத்துக்கே செலவு செய்தாள். இன்னும் சுகமாக வில்லை. 

இப்படி பட்ட நேரத்தில் இயேசுவைக் குறித்துக் கேள்விப்பட்டாள். அந்த ஸ்திரீக்கு இயேசுவை சொன்ன நபர்களுக்காக தேவனைத் துதிக்கின்றேன். இயேசுவிடம் சென்றால் சுகத்தைப் பெற்றுக் கொள்ளலாம் எனக் கூறியதை கேட்டவுடன் இவளுக்கு நெஞ்சிலே பால் வார்த்ததைப் போல இருந்திருக்கும். எந்த விதமான நம்பிக்கையும் இல்லாமல் நடை பிணமாக வாழ்ந்த இவளது உள்ளம் இயேசுவை சந்தித்தால், நோய் சுகமாகிவிடும், எதிர் காலம் பிரகாசமாய் இருக்கும் என்ற நம்பிக்கை துளிர்த்தது. 

 

இன்றும் கூட நாம் இருக்கும் பகுதியில் எத்தனைபேர் இது தெரியாமல் இருக்கின்றார்கள். இப்படிப்பட்டவர்களை சந்தித்து இவர்க ளுக்காக ஜெபிப்போமா?  இயேசுவிடம் ஜெபிக்கக் கற்றுக் கொடுப்போமா? நமக்குத் தெரிந்த ஊழியர்களை அழைத்து வந்து இவர்களுக்காக ஜெபிக்க  சொல்லுவோமா? இதை வாசிக்கின்ற சகோதரிகள் இப்படிப்பட்ட அன்பினால் நிறைந்திருக்க வேண்டும். 

 

சுகத்தைப் பெற்றுக் கொள்ள வேண்டும் என ஆவலுடன் வருகின்றவர்கள் கூட தனக்கான் ஒரு பாதையை தெரிந்து கொண்டு வருகின்றார்கள். உதாரணமாக நூற்றுக்கு அதிபதி, 'ஒரு வார்த்தை சொல்லும் என் வேலைக்காரன் சொச்தமடைவான்' . இன்னொரு இடத்தில் வந்து கைகளை வையும் அப்பொழுது சுகமாவாள். இங்கே நான் அவருடைய வஸ்திரங்களையாகிலும் தொட்டால் சுகமாவேன். 

 

ஜனக்கூட்டம் அவளுக்கு ஒரு தடையாகத் தெரியவில்லை. முண்டியடித்துக் கொண்டு வந்து இயேசுவுக்குப் பின்னாக வந்து அவருடைய வஸ்த்திரத்தை தொட்டாள். அந்த வினாடியே 12 வருடங்களாக பட்ட வேதனை நீங்கி சுகமானதை தன சரீரத்தில் உணர்ந்தாள். அன்பானவர்களே நீங்கள் எப்படிப்பட்ட வியாதியோடு எத்தனை வருடங்கள் பாதிக்கப் பட்டிருந்தாலும் இயேசு கிறிஸ்துவால் உங்களுக்கு சுகத்தைக் கொடுக்க முடியும்.

இயேசு கிறிஸ்து தன்னைத் தொட்டது யார் எனக்  கேட்டபொழுது, பயந்து நடுங்கியபடி முன்னால் வந்தாள். உடனே இயேசு அவளை நோக்கி "மகளே உன் விசுவாசம் உன்னை இரட்சித்தது. சமாதானத்தோடே போ, உன் வேதனை நீங்கி சுகமாயிரு. எவ்வளவு மனசார ஆசீர்வதித்தார் பாருங்கள்!

 

அன்பானவர்களே உங்களில் வியாதியாய் இருப்பவர்களுக்காக நான் ஜெபிக்க விரும்புகின்றேன். இயேசுவின் தழும்புகள் இப்பொழுதும் உங்களை சுகமாக்க வல்லமையுள்ளதாய் இருக்கிறது. வியாதி உங்களை எத்தனை வருடங்கள் பாடாய் படுத்தியிருந்தாலும் சரி.... சுகத்திற்காய் அதிகமாய் செலவழித்திருந்தாலும் சரி..... டாக்டர்களால் கைவிடப் பட்டிருந்தாலும் சரி...... இப்பொழுது இயேசுவை விசுவாசத்தோடு தொட்டீர்களானால் உடனடியாக உங்கள் சரீரத்திலே சுகத்தை உணர முடியும். உங்களைச் சுகமாக்குவதுதான் இயேசுவின் பிரதான தொழில்.     

 

ஜெபிப்போமா?

 

எங்களை அதிகமாய் நேசிக்கின்ற எங்கள் அன்பின் பிதாவே!

உலகத்தின் பாவத்தை சுமந்து தீர்த்த தேவாட்டுக்குட்டி இயேசுவின் நாமத்தில் உம்மிடத்தில் வருகின்றேன்! இந்த செய்தியை வாசிக்கின்ற எனது அன்பான சகோதர சகோதரிகளுக்காய் ஜெபிக்கிறேன். பல்வேறு ஆஸ்பத்திரிக்குச் சென்றும் குணமாகாமல், மன வேதனையோடு இருக்கின்றவர்களுக்காக ஜெபிக்கிறேன். அன்று உமது வஸ்திரத்தை தொட்டபொழுது, உம்மிடத்திலிருந்து வல்லமை புறப்பட்டுச் சென்று 12 வருட வியாதியை ஒரு நொடியில் சுகமாக்கியதைப்போல இன்று உம்மை விசுவாசத்தோடு தொட முயற்சிக்கின்ற எனது சகோதர சகோதரிகள் மீது உமது வல்லமை இறங்கட்டும். இப்பொழுதே தங்கள் சரீரத்தில் சுகத்தை உணருவார்களாக. இயேசுவே நேற்றும் இன்றும் என்றும் மாறாத வல்லமைக்காக நன்றி செலுத்துகின்றேன். தொடர்ந்து பெலப்படுத்தும். உமக்கே சகல துதி கனம் மகிமையை செலுத்துகின்றோம்  உதவி செய்யும் இயேசுவின் மூலம் ஜெபங்களும் பிதாவே. ஆமென்.

 "மெய்யாகவே அவர் நம்முடைய பாடுகளை ஏற்றுக் கொண்டு, நம்முடைய துக்கங்களை சுமந்தார்; நாமோ, அவர் தேவனால் அடிபட்டு வாதிக்கப்பட்டு, சிறுமைப்பட்டவரேன்று எண்ணினோம். நம்முடைய மீறுதல்களினிமித்தம் அவர் காயப்பட்டு, நம்முடைய அக்கிரமங்களினிமித்தம் அவர் நொறுக்கப்பட்டார்;  நமக்கு சமாதானத்தை உண்டுபண்ணும் ஆக்கினை அவைமேல் வந்தது; அவருடைய தழும்புகளால் குணமாகிறோம்". (ஏசாயா 53:4,5) 

 

 

பிரியமானவர்களே! பிறருக்கு நன்மையுண்டாகும்படி உங்களுக்கு ஆண்டவர் செய்த அற்புதத்தை பதிவிட மறக்காதீர்! நன்றி!!!

Bro. K.Selvin Durai

Cell: 09840836690